Fatbike Night Session

Bitrag vum Januar 2017:

Es neus Kapital vu „SC Belance ist für jeden Sch… zu haben“ hemmer im Januar vorema Jahr am 20.30h am Abig zmitts im Winter usprobiert. Ob ma echt frühner mit dera Session hetti sölla starta? Miar hends riskiert…

Obwohl dr Weg uf Trin Staziun abe nid guat gsi isch, simmer gange – aso gfahre – oder eher grutscht – ja mengisch au purzlet – mit em Ziel, dr Wanderweg una am Rhi füra uf Richenau zmache. Hend uf dr Hängebruck no grossartig Föteli gmacht und poset und wo dr Zug am 21.40h verbigfahre isch, gspöttlet, dass das jetzt dr letscht Zug gsi isch, falls miar jetzt da stecka blibend. Erst nachher hemmer s Schild gseh, dass dr Wanderweg gschlossa isch, vermuatlich wäge Lawine oder Rütsch und dr Weg wär aber sowieso so schlecht gsi, dass chum ufem Bike hesch chöna bliba. Und ja, dr Zug isch dr letscht gsi!

Guat, uf Trin ufa… Zum Glück hemmer no d Luft i dä Pnö usalah vorher, damits besser hebt bim abefahre. Für ufa natürli nid so guat. Ja, und wo denn au no d Lupine gmeint het, dr Akku sig denn bald leer, han i zwüschedina denkt, miar chömend nüma hei und e liechti Spannig het sich zwüsched üs igschlicha…

Aber, bekanntlich isch doba s meiste wieder vergessa. Senda Sursilvana isch denn recht cool gsi und miar hends no mit Lupine und alles am 23.30h hei gschafft!

Krass sind denn eifach dia halbe Verfrüriga a dä Oberschenkel gsi und i han mi öppa 1 Stund lang nüm selber chöna ufwärma.

Judihui! 😉

Nici
Bonaduzerwald
Scharlie
Hängebrücke Ruinaulta